Apr 21, 2025 | 12:13 Konfranslar, iclaslar
AMEA-nın Məhəmməd Füzuli adına Əlyazmalar İnstitutunun əməkdaşları Sankt-Peterburq Dövlət Universitetinin Şərq dilləri fakültəsinin 170 illik yubileyi münasibətilə “Asiya və Afrika ölkələrinin mənbəşünaslığı və tarixşünaslığı” mövzusunda keçirilmiş XXXIII beynəlxalq elmi konqresdə onlayn şəkildə məruzə ediblər.
Azərbaycan, Türkiyə, Rusiya, Kanada, Fransa, Özbəkistan, Tatarıstan, Yaponiya və bir sıra ölkələrdən alim və mütəxəssislərin iştirak etdiyi konqresdə institutun elmi işlər üzrə direktor müavini, Əlyazmaların və əski çap kitablarının tərcüməsi şöbəsinin müdiri fil.ü.f.d., dosent Əkrəm Bağırov “Mir Təqiəddin Kaşani və onun təzkirəsində Azərbaycan şairləri”, həmin şöbənin baş elmi işçisi fəl.e.d., dosent Zəkiyyə Əbilova və böyük elmi işçisi Xatirə Kərimova müvafiq olaraq “Məqtəl janrı və onun Azərbaycan ədəbiyyatında yeri” və “Mirzə Kazımbəyin elmi irsi” adlı məruzələrlə çıxış ediblər. Məruzələr konqres iştirakçıları tərəfindən maraqla qarşılanıb, verilən suallar cavablandırılıb.
Qeyd edək ki, beynəlxalq elmi konqres “Eastern Tribune” elmi-analitik portalının dəstəyi ilə Sankt-Peterburq Dövlət Universiteti və Şərq dilləri fakultəsinin birgə təşkilatçılığı ilə həyata keçirilib.
www.science.gov.az
