Dec 25, 2024 | 17:01 Mühüm hadisələr
AMEA-nın Folklor İnstitutunun aparıcı elmi işçiləri - fil.ü.f.d, dos. Hikmət Quliyev və fil.ü.f.d., dos. Aynur İbrahimova Respublika Uşaq-Gənclər İnkişaf Mərkəzinin (RUGİM) rəhbəri Firuzə Sultanovanın dəvəti ilə “Molla Nəsrəddinin əfsanəvi müdrik dərsləri” adlı respublika müsabiqəsinin final və mükafatlandırma mərasimində qonaq və münsif qismində iştirak ediblər.
Tədbirdə çıxış edən dos. Hikmət Quliyev milli-mənəvi dəyərlərin qorunması və gələcək nəsillərə ötürülməsi sahəsində ölkəmizdə həyata keçirilən dövlət siyasətinin tərkib hissəsi kimi folklorumuzun tədqiqi və təbliği ilə bağlı görülən işlər barədə danışıb. Qeyd edib ki, “Kitabi-Dədə Qorqud”, “Koroğlu” eposları ilə bərabər, Molla Nəsrəddin lətifələri də ümumtürk mədəniyyətinin ortaq dəyəridir. Molla Nəsrəddin lətifələri zaman və məkan sərhədlərini aşmaqla gülüşə bürünmüş müdrikliyi özündə ehtiva edir. Həmçinin vurğulayıb ki, şifahi mədəni mühitdə Molla Nəsrəddin lətifələri ənənəsindən başlayan yol “Molla Nəsrəddin” jurnalı qismində yeni bir zirvəyə yüksəldi.
Qeyd edilib ki, şagirdlər tərəfindən hazırlanan səhnəciklər, çəkilən rəsmlər və yaradıcı “stand up”lar Molla Nəsrəddin lətifələrinin, bütövlükdə milli-mənəvi dəyərlərimizin, xalq müdrikliyinin yenidən canlandırılması, müasir şəraitdə kollektiv mədəni yaddaşda reaktuallaşdırılması baxımından olduqca mühüm əhəmiyyət kəsb edir.
Tədbirdə qonaq və münsif qismində eyni zamanda UNESCO üzrə Azərbaycan Respublikasının Milli komissiyasının ikinci katibi Mustafa Şabanov, Akademik Musiqili Teatrın baş rejissoru Cavid İmamverdiyev, həmin teatrın aktyoru, Əməkdar artist İqrar Salamov, Akademik Milli Dram Teatrın aktyoru, Prezident mükafatçısı Ramin Şıxəliyev, Azərbaycan Respublikası Elm və Təhsil Nazirliyi yanında Məktəbəqədər və Ümumi Təhsil üzrə Dövlət Agentliyinin Məktəbdənkənar fəaliyyətin təşkili sektorunun aparıcı məsləhətçisi Cəmil Piriyev və Azərbaycan Respublikasının Əməkdar artisti, naşir Bəhram Bağırzadə iştirak ediblər.
www.science.gov.az
