Oct 03, 2023 | 12:40 Mühüm hadisələr
2 oktyabr 2023-cü il tarixində AMEA-nın Məhəmməd Füzuli adına Əlyazmalar İnstitutunun baş direktoru, Azərbaycan Respublikasının Dövlət mükafatı laureatı, “Şöhrət” ordenli akademik Teymur Kərimlinin 70 yaşı tamam olub.
Bu münasibətlə “Ədəbiyyat qəzeti”nin son sayında Azərbaycanın görkəmli alimləri - akademik Yusif Məmmədəliyev adına Neft-Kimya Prosesləri İnstitutunun baş direktoru, akademik Vaqif Abbasovun “Akademik Teymur Kərimliyə açıq məktub”, AMEA-nın Folklor İnstitutunun baş direktoru, akademik Muxtar İmanovun “Klassik ədəbiyyatımızın xiridarı”, Azərbaycan Respublikası Mədəniyyət Nazirliyi Hüseyn Cavidin Ev Muzeyinin direktoru, fil.e.d. Gülbəniz Babaxanlının “Nizamişünaslıqdan cavidşünaslığa uzanan alim ömrü”, tərcüməçi, tənqidçi-publisist, Azərbaycan Yazıçılar Birliyinin üzvü Abuzər Bağırovun “Bənzərsiz elm və ədəbiyyat adamı”, AMEA-nın Məhəmməd Füzuli adına Əlyazmalar İnstitutunun Çap kitablarının tədqiqi şöbəsinin müdiri, tarix ü.f.d., dosent Cavid Cəfərovun “Böyük alim, səriştəli elm təşkilatçısı” və AMEA Nizami Gəncəvi adına Ədəbiyyat İnstitutunun aparıcı elmi işçisi, fil.ü.f.d., dosent Təhminə Bədəlovanın “Elmimdən çəkinməsəydim, Ləbiddən də gözəl söylərdim” başlıqlı məqalələri nəşr olunub.
Bununla yanaşı, qəzetin bir neçə səhifəsini əhatə edən “Görkəmli elm və mədəniyyət xadimləri akademik Teymur Kərimli haqqında” başlığı altında AMEA-nın prezidenti, akademik İsa Həbibbəylinin, ədəbiyyatşünas, tənqidçi, AMEA-nın həqiqi üzvü Bəkir Nəbiyevin, akademiklər Arif Həşimovun, İbrahim Quliyevin, İradə Hüseynovanın, Dilqəm Tağıyevin, Rasim Əliquliyevin, Gövhər Baxşəliyevanın, Kamal Abdullanın, Nizami Cəfərovun, Nərgiz Axundovanın, Möhsün Nağısoylunun, İsmayıl Hacıyevin, Fəxrəddin Qədirovun, AMEA-nın müxbir üzvləri Ərtegin Salamzadənin, Misir Mərdanovun, tarix e.d., görkəmli dövlət xadimi, diplomat Həsən Həsənovun, xalq şairi Vahid Əzizin, tənqidçi-ədəbiyyatşünas, şair, fil.e.d., dosent Paşa Əlioğlu Kərimovun, tənqidçi-ədəbiyyatşünas, fil.ü.f.d. Qurban Bayramovun, filoloq-tarixçi, fil.e.d., professor Vaqif Arzumanlının, tarix ü.f.d., şair, nasir, publisist Arzu Nehrəmlinin və fil.ü.f.d., dosent Əzizağa Nəcəfzadənin böyük alim və istedadlı şəxsiyyət kimi şərəfli ömür yolu keçmiş, Orta əsrlər Azərbaycan ədəbiyyatının və böyük Nizami yaradıcılığının ən qüdrətli tədqiqatçısı Teymur Kərimli haqqında ürək sözləri və dəyərli fikirləri təqdim olunub.
Akademik Teymur Kərimli haqqında “Ədəbiyyat qəzeti”nin son sayında dərc olunan materialların tam mətni ilə buradan tanış ola bilərsiniz.
www.science.gov.az
