Sep 20, 2023 | 17:00 Yeni nəşrlər
AMEA-nın Məhəmməd Füzuli adına Əlyazmalar İnstitutunun böyük elmi işçisi Sevinc Dadaşovanın “Ön söz” yazaraq tərtib etdiyi “Heydər Əliyev və Azərbaycan dili” mövzusunda yazılmış məqalələr toplusu ayrıca kitab halında nəfis şəkildə işıq üzü görüb.
“Heydər Əliyev İli” çərçivəsində işıq üzü görmüş məqalələr toplusu “Heydər Əliyev və ədəbi irsimiz” kitabının davamı olaraq tərtibçi tərəfindən hazırlanmış II kitabıdır. Nəşrdə Ümummilli Lider Heydər Əliyevin Azərbaycan dilinə olan sevgi və bağlılığını, qayğı və diqqətini əks etdirən məqalələr yer alıb. Topluda 2001-ci ildən 2023-cü ilə qədər Azərbaycan mətbuatında və internet portallarında mövzu ilə əlaqəli respublikanın tanınmış elm və mədəniyyət xadimləri tərəfindən qələmə alınmış məqalələr günümüzün tarixindən keçmişə doğru sıralanaraq çap olunub.
Elmi redaktoru filologiya üzrə fəlsəfə doktoru Akif Əliyev olan yeni nəşrə AMEA-nın prezidenti, akademik İsa Həbibbəyli, millət vəkili, filologiya elmləri doktoru Jalə Əliyeva, akademik Möhsün Nağısoylu, Dövlət mükafatı laureatı, filologiya elmləri doktoru, professor Nizaməddin Şəmsizadə və başqa alimlərin Ümummilli lider Heydər Əliyevin müstəqilliyimizin başlıca rəmzlərindən biri olan Azərbaycan dilinin dövlət dilinə çevrilməsi istiqamətində gördüyü misilsiz xidmətləri, bu dilə qayğı və diqqətini, bir sözlə ana dilimizin təbliği və inkişafı naminə xidmətlərini əks etdirən və 2023-cü ilədək mətbuatda dərc olunan zəngin informativ bazaya malik yazıları daxil edilib.
Qeyd edək ki, Sevinc Dadaşovanın ideya müəllifi olduğu, “Heydər Əliyev və mədəni irsimiz” tematikasını özündə ehtiva edən bu layihəyə əsasən dünya şöhrətli siyasi və dövlət xadimi olmaqla yanaşı, çoxşaxəli fəaliyyət arenasına sahib Heydər Əliyev haqda yazılmış müxtəlif sahələrə aid məqalələrin də toplanaraq gələcəkdə ayrıca kitab şəklində nəşri nəzərdə tutulub.
www.science.gov.az
