Jun 26, 2023 | 09:00 Mühüm hadisələr
Hörmətli həmkarlar!
İyunun 28-29-da İslam dünyası müqəddəs Qurban bayramını qeyd edəcəkdir.
Bu bayramda Allah yolunda qurbanlar kəsilir, dualar, ibadətlər edilir, insanlar ehtiyacı olanlara, kimsəsizlərə yardımlar edir, cəmiyyətə İslam dininin təməllərini təşkil edən mənəvi paklıq, xeyirxahlıq və humanizm duyğuları aşılanır.
İslam dininin dəyərləri daim ölkəmizdə yüksək ehtiram görüb, mühafizə olunub, qorunub və müqəddəs Qurban bayramı da xalqımız tərəfindən əsrlərdir yaşadılır. Müstəqillik illərində isə dövlət səviyyəsində rəsmi bayram kimi qeyd edilir.
İslam dəyərlərinin ölkəmizdə yaşadılmasında Ulu Öndər Heydər Əliyevin misilsiz xidmətləri olmuş, görkəmli dövlət xadimi sovet rejiminin sərt dini qadağalarının olduğu illərdə həmişəki kimi xalqımızın yanında yer alaraq, onların dini inanclarının, adət-ənənələrinin qorunub saxlanmasına özünün mühüm töhfəsini vermişdir. Ümummilli Lider daim dini-mənəvi dəyərlərimizin qeydinə qalmış, məscidlərin, dini komplekslərin, tarixi-dini abidələrin bərpasına, yeni məscidlərin tikintisinə, eləcə də din adamlarına qayğı ilə yanaşmışdır. 2001-ci ildə dini fəaliyyət sahəsində dövlət siyasətini həyata keçirən Dini Qurumlarla İş üzrə Dövlət Komitəsi yaradılmışdır.
Ötən illər ərzində Azərbaycanda multikulturalizmin, tolerantlığın dövlət siyasətinin tərkib hissəsinə çevrilməsi, müxtəlif xalqların nümayəndələrinin həmrəylik içərisində birgə yaşaması dünya ölkələri üçün bir örnəyə çevrilib və bu siyasət Ulu Öndərin layiqli davamçısı Prezident İlham Əliyevin çoxistiqamətli fəaliyyətində mühüm yer tutur.
Son illərdə Prezident İlham Əliyevin və Azərbaycanın Birinci vitse-prezidenti Mehriban xanım Əliyevanın diqqəti və qayğısı sayəsində Heydər Əliyev Fondu tərəfindən ölkəmizdə İslam dininə və digər dinlərə məxsus olan bir çox ibadətgahlar, dini komplekslər təmir olunub, xalqımızın istifadəsinə verilib. Həmçinin bu gün Qarabağa “Böyük Qayıdış” hərəkatı çərçivəsində düşmən tərəfindən 30 il ərzində dağıdılmış məscidlər, tarixi-dini abidələr bərpa bərpa olunur, yenilərin tikintisi istiqamətində işlər davam etdirilir.
Hörmətli həmkarlar,
Sizi Qurban bayramı münasibətilə səmimi qəlbdən təbrik edir, Uca Allahdan qurbanlarınızın qəbul olunmasını diləyir, cansağlığı və elmi fəaliyyətinizdə uğurlar arzulayıram.
İsa HƏBİBBƏYLİ,
Azərbaycan Milli Elmlər Akademiyasının prezidenti, akademik
www.science.gov.az
