AZƏRBAYCAN MİLLİ                  ELMLƏR AKADEMİYASI
HUMANİTAR ELMLƏR BÖLMƏSİ
“Heydər Əliyev epoxası: tarix və müasirlik” mövzusunda elmi konfrans keçirilib
İyl 15, 2019 | 03:09 / Konfranslar, iclaslar
Oxunub 18 dəfə

İyulun 11-də AMEA-nın Rəyasət Heyətində Azərbaycan xalqının ümummilli lideri, görkəmli dövlət xadimi Heydər Əliyevin siyasi hakimiyyətə başlamasının 50 illiyinə həsr olunmuş “Heydər Əliyev epoxası: tarix və müasirlik” mövzusunda elmi konfrans keçirilib.

Tədbiri AMEA-nın prezidenti, akademik Akif Əlizadə giriş sözü ilə açaraq ümummilli lider Heydər Əliyevin hakimiyyətə gəlməsi ilə 14 iyul 1969-cu ilin Azərbaycanın tarixinə əlamətdar hadisə kimi yazıldığını diqqətə çatdırıb. Dahi şəxsiyyətin yalnız Azərbaycanın deyil, türk aləminin böyük siyasətçisi olduğunu deyən akademik Akif Əlizadə onun əsasını qoyduğu ideologiyanın ölkə hüdudlarından kənarda da yayıldığını qeyd edib. Azərbaycanın firavanlıq, əmin-amanlıq şəraitində yaşamasına, eləcə də siyasi, iqtisadi, elmi və mədəni sahələrin elmi əsaslarla inkişafına bütün həyatını həsr edən tarixi şəxsiyyətin, Ulu öndərin uzaqgörən siyasəti və cəsarəti ilə nail olunduğunu nəzərə çatdırıb.

Sonra AMEA-nın vitse-prezidenti, akademik İsa Həbibbəyli “Azərbaycanın müstəqillik dərsləri: Heydər Əliyevdən İlham Əliyevə” adlı məruzə ilə çıxış edib.

“Hansı xalq millətlərin, bəşəriyyətin həyatında mühüm rol oynayan dahi şəxsiyyətləri rəhbər vəzifəyə gətirib taleyini ona etibar edirsə o tarixin bütün sınaqlarından uğurla çıxır, gələcəyə doğru inamla addımlayır” deyən akademik İsa Həbibbəyli Azərbaycana Heydər Əliyev kimi dahi şəxsiyyətin uzun illər rəhbərlik etməsinin Azərbaycan xalqının həyatında da dönüş yaratdığını vurğulayıb.

Sovetlər dövründə Heydər Əliyevin hakimiyyətə gəlişi ilə keçmiş sovetlərin ən qabaqcıl inkişaf etmiş ölkələrindən birinə çevrildiyini deyən vitse-prezident 14 iyulun Azərbaycanda böyük dönüşün möhtəşəm başlanğıcı olduğunu vurğulayıb. Ölkənin strategiyasının müəyyən olunması ilə tarixə yazılan 14 iyulun ölkəmizi parçalanmaqdan, vətəndaş müharibəsindən qurtardığını deyən akademik 15 iyuna qədər Azərbaycanın keçdiyi şərəfli tarixi yolun müəllifinin görkəmli dövlət xadimi Heydər Əliyev olduğunu qeyd edib. 1969-cu ildə keçirilən məşhur avqust plenumuna da toxunan akademik İsa Həbibbəyli “14 iyul Azərbaycanda böyük dönüşün möhtəşəm başlanğıcıdırsa, avqust plenumu Heydər Əliyevin dövlətçilik modeli və dövlətçilik təliminin uzunmüddətli strategiyasıdır. Heydər Əliyevin avqust plenumunda qaldırdığı məsələlər sovet Azərbaycanının proqramına çevrildi. Bu məsələlər müstəqil Azərbaycanda da dövlət müstəqilliyinin möhkəmləndirilməsi və inkişaf etdirilməsinə işıq salan qərarlardır”.

Sonra millət vəkili, Xalq yazıçısı Elmira Axundova “1969-cu ilin 6 avqust plenumu: Böyük dönüşün möhtəşəm başlanğıcı” mövzusunda məruzə edib. Heydər Əliyevin ilk hakimiyyətə gəlişindən söz açıb, şahidlərin bu dönəmlə bağlı söylədikləri xatirələri bölüşüb. Ümummilli liderin avqust plenumundakı çıxışı zamanı korrupsiya, rüşvətxorluq və s. kimi problemlər barədə səsləndirdiyi fikirlərdən söz açıb.

Tədbirdə A.Bakıxanov adına Tarix İnstitutunun direktoru, akademik Yaqub Mahmudovun “Heydər Əliyev – Dünya şöhrətli, görkəmli dövlət xadimi” adlı məruzəsi dinlənilib. Akademik Yaqub Mahmudov avqust plenumunda Ulu öndərin sovetlər sistemində heç kəsin cəsarət etmədiyi fikirləri gündəmə gətirməsi ilə onun siyasi xəttinin müəyyənləşdiyini, ağır sovet rejimindəki fəaliyyəti ilə gələcək Azərbaycan modelinin hazırlandığını bildirib. Vurğulayıb ki, Heydər Əliyev hər zaman axına qarşı gedərək tarixin gedişini dəyişən şəxsiyyətlər sırasında yer alıb və bütün çətinliklərə rəğmən hazırkı Azərbaycanı yaradıb.

AMEA-nın Ə.M.Quliyev adına Aşqarlar Kimyası İnstitutunun direktoru, akademik Vaqif Fərzəliyev “Azərbaycan elmi Heydər Əliyev epoxasında” mövzusu ilə məruzə edib. Çıxışında Heydər Əliyevin hakimiyyətə başlaması və 1993-cü ildə yenidən qayıdışından sonra respublikada elmi sahələrin inkişafı istiqamətində görülən işlərdən danışıb. Azərbaycan Milli Elmlər Akademiyasının ikinci, 1970-1980-ci illərdəki çiçəklənmə dövrünün Ulu öndərin adı ilə bağlı olduğunu deyən akademik Vaqif Fərzəliyev həmin dövrdə alimlərin əməyinin qiymətləndirilməsində də Heydər Əliyevin böyük rolu olduğunu söyləyib.

© Bütün hüquqlar qorunur. Xəbərlərdən istifadə edərkən www.heb.science.gov.az saytına istinad zəruridir.

Copyright © AMEA İnformasiya Texnologiyaları İnstitutu, 2015